GRIPI I DERRIT/ Shënohet viktima e parë në Kosovë

Prishtinë – Ministria e Shëndetësisë e Republikës së Kosovës ka konfirmuar se të shtunën, në vendin tonë është shënuar rasti i parë i vdekjes nga virusi i ri pandemik A H1N1. H. A. E, i lindur më 1978, në fshatin B. të Drenasit, ka ndërruar jetë sot në orën 7 e 10 minuta në Klinikën Infektive të Qendrës Klinike Universitare të Kosovës.

Shenjat e para të sëmundjes, në mesin e te cilave edhe temperatura e ngritur mbi 38 shkallë celsius, tek i ndjeri ishin paraqitur me datë 25 tetor 2009, ndërsa ndihma e parë mjekësore nga ai është kërkuar te mjeku familjar në Drenas më 8 nëntor 2009.

I ndjeri është hospitalizuar në Klinikën Infektive me datë 12 nëntor 2009 në orët e mesditës, ku i është nënshtruar të gjitha ekzaminimeve mjekësore dhe trajtimit me Tamiflu, ndërsa të nesërmen, Qendra Kombëtare për Grip e Institutit Kombëtar të Shëndetësisë Publike, ka konfirmuar praninë e virusit A H1N1 tek i dyshuari për gripin e ri.

Mirëpo, përkundër angazhimit të shtuar dhe trajtimit mjekësor, pacienti ka ndërruar jetë në ditën e sotme.

Në të njëjtën kohë, tek i ndjeri ishin konfirmuar edhe probleme të tjera shëndetësore si insuficiencë kardio-respiratore, infiltrime pulmonare dhe deficiencë të shprehur imunitare.

Duke shprehur keqardhje për këtë rast dhe duke i shprehur ngushëllime të sinqerta familjes për humbjen e familjarit të tyre, Ministria e Shëndetësisë u ka bërë thirrje të gjithë qytetarëve për vigjilencë të shtuar dhe paraqitje sa më të shpejtë te mjeku, sapo të hetojnë shenja të dyshimta të gripit, e në veçanti ngritje të temperaturës mbi 38 shkallë celsius.

Njëkohësisht, MSH ka bërë thirrje që të mos krijohet panik, duke qenë se në vendin tonë po zbatohen të gjitha masat e rekomanduara nga OBSH për menaxhimin e Pandemisë së gripit A H1N1 dhe Grupi për menaxhimin e situatës, do të vazhdojë të zbatojë secilën masë që do të jetë e nevojshme, në mënyrë që pasojat nga virusi i ri në vendin tonë, të jenë sa më të vogla.

Që nga paraqitja e rasteve të para të Gripit A H1N1 në Kosovë janë konfirmuar 32 raste me AH1N1 pozitive. www.alblajme.com

Pajtim Bello: Greqia, në dijeni që prej 1989-s për naftën në Otranto

Shteti grek ka qenë në dijeni të kërkimeve për naftë në territorin detar të Otrantos që prej vitit 1989. Është ish-zëvendësministri i METE, Pajtim Bello, i cili reagon lidhur me pohimin e Ferit Hoxhës, pasi ky i fundit deklaroi dy ditë më parë se Greqia mësoi nga mediat shqiptare për naftën e Otrantos në vitin 2006. Bello thekson se që prej vitit 1989 Greqia si dhe shtete të tjera kanë qenë në dijeni të kërkimeve të hidrokarbureve në territorin detar të Shqipërisë në zonën e Otrantos.

Zoti Bello, në një intervistë të disa ditëve më parë që ju keni dhënë për gazetën “Shekulli”, keni deklaruar se ka patur një studim për blloqet e prespektivës së burimeve të naftës e të gazit të publikuar në vitet 1988-1989. Keni sqaruar se territori detar i diskutuar në media bënte pjesë në zonën 5 të përcaktuar në studim. A kanë qenë në dijeni të këtij studimi edhe shtete të tjera në atë kohë? Po Greqia, konkretisht, a është njohur me faktin se në Otranto mund të kishte rezerva nafte?

-Po, Greqia si edhe shumë shtete të tjera janë njohur me studimin në fjalë që prej vitit 1989. Ishte një studim, në të cilin ishin përcaktuar gjithë zonat e prespektivës së burimeve të mundshme të hidrokarbureve, siç janë nafta dhe gazi. Në studimin në fjalë, territori detar në zonën e Otrantos bënte pjesë në zonën numër 5. Që prej ‘89-ës vendi ynë ka kryer disa simpoziume, ku kanë marrë pjesë mjaft shtete të tjera, ndër to edhe Greqia.

Pra, Greqia ka qenë në dijeni të burimeve të mundshme të naftës në këtë zonë që prej vitit 1989?

-Po kjo është diçka faktike, pala greke ka qenë e njohur me studimin, pasi shteti ynë gjatë këtyre simpoziumeve ka qenë i interesuar për ndonjë marrëveshje të mundshme për të kryer kërkime në terren për hidrokarburet. Madje, një marrëveshje është kryer atëherë me firmën austriake Benimex. Studimi në fjalë është bërë publik që prej asaj kohe për ndërkombëtarët. Kështu që, nuk dihet përse pala greke nuk ka pranuar të kryejë marrëveshjen për ndarjen e kufijve gjatë tentativave të diplomacisë sonë gjatë 13 viteve.

Sipas Zotit Ferit Hoxha, ish-Sekretari i Përgjithshëm i Ministrisë së Jashtme dhe kryenegociatori i marrëveshjes detare, pohoi se pala greke u interesua pas publikimit të një përditshmeje për kërkimet e naftës që po kryheshin në detin Jon. Ju si e komentoni këtë deklarim?

-Është e vërtetë se pala greke është e interesuar për burimet e shumta të energjetikës që mund të ketë nëntoka e ujërave të detit Jon, e pikërisht pjesa e kanalit të Otrantos. Por nuk pajtohem me faktin se shteti grek e ka mësuar në vitin 2006 nga një media shqiptare, se në zonën detare në fjalë ka rezerva nafte apo gazi natyror. Kjo, pasi pala greke ka qenë e mirinformuar për këtë fakt që prej vitit 1989. Nuk e kuptoj pse pala greke është interesuar pikërisht në vitin 2006, kur kishte refuzuar prej 13 viteve. Gjithashtu, është e pakuptimtë që shteti ynë firmos që në kërkesën e parë që bën pala greke, kur kjo e fundit i kishte refuzuar për më shumë se një dekadë. Zona detare në fjalë është mjaft e rëndësishme edhe nga pikëpamja strategjike. Kjo, pasi pikërisht aty janë planifikuar kalimi i rrjeteve të shpërndarjes së energjive të dy projekteve të mëdha, ai i gazit dhe i energjisë së pastër.

*************

Marreveshja nderkohe eshte lene pezull. Per te shmangur nje “Jo” qe do ti sillte telashe direkte me Athinen, Tirana zyrtare ka vepruar ne menyre burracake. Kuvendi i Shqiperise ka bere nje dredhi ne kalendarin e punimeve duke rishtypur nje kalendar te ri per periudhen deri ne 20 tetor.
Deklarimet e djeshme zyrtare te Kuvendit, ishin qe “Kuvendi nuk kishte parashikuar ratifikim te marrveshjes ujore me Greqine, dhe se data 19 tetor ishte sajese e mediave”
Eshte serish nje genjeshter. Shekulli posedon nje kopje te Kalendarit te punimeve te Kuvendit, ku thuhet e zeza mbi te bardhe qe ne daten 19 tetor Kuvendi ratifikon marreveshjen ujore me Greqine.
Kuvendi ka rishtypur nje kalendar te ri me shpejtesi ne dy ditet e fundit ne kopertinen e te cilit mungon data dhe ne brendesi te gjitha pikat jane njesoj me te parin, me vetem nje perjashtim: Ratifikimi i marreveshjes eshte zhdukur nga kalendari.
Pra deklarata se ratifikimi nuk ishte parashikuar, bie poshte. Ai ishte parashikuar dhe eshte hequr. Por eshte hequr jo duke vepruar si shtet serioz pra duke deklaruar me pergjegjesi dhe korrektesi qe Kuvendi i Shqiperise ka vendosur shtyrjen e ratifikimit, por duke bere lojra me kalendare.

Pakti detar, firmosësit u shpërblyen me poste dhe grada

Anëtari i ekipit negociator të Shqipërisë u emërua në shtator zv. shef i Shtabit të Përgjithshëm dhe u gradua kundër admiral
“Unë jam Kristaq Gerveni. Vij këtu në rolin e ekspertit të detit dhe të ligjit të detit dhe si anëtar i grupit negociator për ndarjen e detit me Greqinë. Jam oficer marine, kam punuar tetë vjet në nëndetëse, 9 vjet kam punuar në Akademinë e Detarisë, ku kam qenë komandant i shkollës. Kam bërë në vitin 1996 një specializim në kolegjin e Flotës në Amerikë, ku kam dhënë provim edhe të drejtën e detit. Në 2001 jam diplomuar në Universitetin e Mbrojtjes në Amerikë, ku kam mbrojtur dhe një gradë shkencore për sigurinë kombëtare. Kam punuar në detyra të ndryshme, kohët e fundit kam qenë për katër vjet komandant i flotës dhe tani kam një muaj që kam filluar zëvendësshef i Shtabit të Përgjithshëm. Megjithatë, unë sot kërkoj që të më trajtoni vetëm si ekspert të detit dhe anëtar të grupit negociator për ndarjen e detit me Greqinë”.
Kështu prezantohet para gazetarëve, ushtaraku 50-vjeçar nga Vlora, i cili prej majit 2009 ka marrë përsipër të sqarojë paktin detar me Greqinë, të sulmojë ata që e analizojnë si shitje të territoreve, dhe të mos jetë “trimi i mirë me shokë shumë”, sepse megjithëse një grup i madh negociator, asnjë ministri tjetër nuk ka marrë përsipër të dalë përpara publikut, i cili është i bindur se këtu ka një hile të madhe, në përfitim të shtetit grek. “Edhe pse grekët në negociata nuk na e pranuan gjirin e Sarandës, si gji të mbyllur, na pranuan pesë gjire dhe gjirin e Sarandës jo, se duan të jenë në rregull edhe ata me qeverinë dhe popullin e tyre”- thotë në një moment kundëradmiral Gerveni, duke radhitur shpjegimet e rrathëve dhe vijave, sipas të cilave, Shqipëria ka fituar më shumë se çfarë kishte menduar.
Deri pak kohë më parë, mbante gradën e kapitenit të rangut të parë dhe emri i tij ishte përmendur në media, vetëm në lajme fatkeqësish, me humbje njerëzore dhe materiale. Në korrik 2006, ishte ushtaraku më i mediatizuar i edicioneve informative dhe faqeve të para të gazetave. Helikopteri tip “Bell 222″, me të cilin udhëtonin Gramoz Pashko dhe pesë persona të tjerë, ishte rrëzuar në detin Adriatik dhe Gerveni si komandant i Forcave Detare, shprehej se do të duhej kohë për të bërë të mundur nxjerrjen e helikopterit dhe trupave, nga thellësia e madhe e detit, që shkonte edhe 1000 metra. Trupat nuk u gjetën asnjëherë.
Pas tragjedisë së Gërdecit, mediat raportonin se tragjedi të tilla mund të ndodhnin jo vetëm në tokë, por edhe në det. “Plazhet e Pastra 2008″, iu besua Brigadës Detare, për pastrimin e ujërave përgjatë gjithë vijës bregdetare të Gjirit të Vlorës nga mbetje të predhave të Luftës së Dytë Botërore. Mbi 34 ton municione u nxorën nga thellësitë e detit përgjatë gjirit të Vlorës, kryesisht në zonën e Ujit të Ftohtë, Kalasë dhe të vetë buzës së ujit në pjesën perëndimore të qytetit.
Në mars 2009, niste aksioni për fundin e historisë së nëndetëseve të Shqipërisë. Nëndetëset e Pashalimanit dhe të gjitha mjetet e tjera detare të kohës së komunizmit, të cilat edhe kërkoheshin nga muzetë e disa vendeve ish-socialiste të Evropës Qendrore, u vendosën që do të shiteshin për skrap.
Ish-kreu i flotës detare shqiptare, që thotë se ka punuar me nëndetëset për tetë vjet, njoftonte se do të ruhej vetëm një nga nëndetëset, si relike për të rrëfyer historinë e tyre të dikurshme, dhe një nga anijet e luftës. 44 anije të tjera do të priten dhe do të përfundojnë për skrap. Duke ndjekur fatin e keq të tankeve ruse dhe kineze dhe të avionëve MIG-ë, që u shkëmbyen për disa automjete nga ushtria greke.
Në dukje, është një karrierë “hap pas hapi”. Gerveni, pas mbarimit të Akademisë së Detarisë në 1983, e nis detyrën e ushtarakut në nëntor të atij viti si shef lundrimi në nëndetëse në Vlorë, pas një dekade bëhet Shef i Katedrës së Lundrimit në Akademinë e Detarisë në Vlorë, post ku rikthehet sërish pas katër viteve deri në 2000. Në shkurt 2003 Gerveni “fut” këmbët” në Shtabin e Përgjithshëm të Forcave të Armatosura dhe në 2 shtator 2009 emërohet zv. Shef i Shtabit të Përgjithshëm të FA-së.
Me të njëjtin ritëm edhe gradimet. Në nëntor 1991 kishte gradën e Kapiten Lejtnantit dhe shkallë pas shkalle në maj 2000 merr gradën Kapiten i Rangut I. Ndërsa në 18 shtator 2009, gradohet Kundër Admiral. Një javë më vonë, në 25 shtator Komisioni Parlamentar i Ligjeve, me anëtarë vetëm deputetët e shumicës dhe pa praninë e opozitës, miraton paktin detar Shqipëri-Greqi.

Zgjedhjet në PS. Rama: Votimi sot, pengesë ndaj kundërshtarëve

Rreth 82 mijë socialistë do të votojnë sot sipas parimit ”një anëtar një votë”për kryetarin e partisë më të madhe në opozitë. Qendrat janë hapur që në orën 08.00 dhe votimi po shkon normalisht. Votoi kandidati për kryetar Edi Rama dhe Maqo Lakrori. Rama voton per kreun e ri te PS dhe denoncon ne media me emra kundershtaret sipas tij, politike te PS .
Rama: Votimi sot që të pengojmë kundërshtarët e PS

Ora 11:00-Edi Rama pasi votoi sot në njësinë bashkiake numër 2 në kryeqytet për kreun e ri të socialistëve vlerësoi sot se PS është forca më e madhe demokratike në vend dhe ftoi partitë e tjera të ndjekin të njëjtën rrugë për zgjedhjen e krerëve. Rama theksoi se votimi sot është dhe pengesa më e madhe për kundërshtarët e PS si aleancat Berisha-Meta-Nano qe tentuan ta perbaltin ate.

“Ashtu sikundër Sali Berisha, Ilir Meta e Fatos Nano e kompania e altoporlantët e tyre kanë bërë cmos ta zhvleftësojnë e perbaltin, procesin e sotem, por votimi sot tregon që është jo vetëm i bukur e real, por që tregon se PS është forca më e madhe e demokratike në Shqipëri dhe pengesë e pakapërcyeshme për ta kthyer pushtetin e popullit në një pushtet që nuk mbron interesat e popullit”, u shpreh Rama në një komunikim të shkurtër për mediat.

Rama u shpreh se nuk do të jetë e largët dita kur edhe partitë e tjera të ndjekin të njëjtën rrugë për zgjedhjen e krerëve.
“Sot është një moment me rëndësi në jetën e Partisë Socialiste pasi u jep mundësi të gjithë anëtarëve të saj të zgjedhin kryetarin e tyre. Theksoj se sot kemi një proces demokratik, pa asnjë farë dyshimi se në të ardhmen duhet ta avancojnë atë edhe forcat e tjera politike. Kjo pasi është e pashmangshme që forcat e tjera të demokratizohen pa filluar nga vendimarrja e drejtpërdrejtë e anëtarëve”, u shpreh Rama.

TIRANE- Zgjedhjet PS,voton Maqo Lakrori
Ora 10:21 Që prej orës 08.00 të mëngjesit janë hapur kutitë e votimit për anëtarët e PS-së të cilët do të votojnë për kryetarin e tyre të ri. Në garë për postin e drejtuesit të Partisë Socialiste janë Edi Rama dhe Maqo Lakrori. Ky i fundit votoi rreth orës 10:00 në qendrën e votimit të hapur në njësinë nr. 9 të Tiranës, ndërsa Edi Rama pritet të votojë në orën 11.00.

PS zgjedh sot kryetarin e ri, bojkotojnë anti-Ramat
Ora 07:50 Socialistët do t’u drejtohen sot kutive të votimit për të zgjedhur kryetarin e tyre mes Edi Ramës dhe Maqo Lakrorit. Në të gjithë vendin janë rreth 400 qendra votimi, ku do të votojnë afro 82 mijë socialistë, sipas parimit “1 anëtar-1 votë” për kryetarin e ri. Qendrat do të hapen nga ora 08.00 dhe deri në orën 16.00. Ndërsa rezultati që do të dalë nga Komisioni i Zgjedhjeve në parti, në komunikim të vazhdueshëm me mediat.

Por, zgjedhjet e sotme do të bojkotohen nga një pjesë e tyre, që nga ish-kryetari Fatos Nano apo deputetët e tjerë kundërshtarë. Ben Blushi e deklaroi dy ditë më parë gjatë një interviste televizive se, “në këto zgjedhje unë nuk marr pjesë si votues”. “Nuk kam asnjë alternativë e cila më bind, për fat të keq, për më tepër askush nuk më kërkoi të votoj për një humbës. I them gjithë socialistëve sot se nuk kanë arsye të votojnë për një njeri i cili ka humbur zgjedhjet. Ata socialistë që shkojnë në 26 shtator për ta zgjedhur Edi Ramën si kryetar të PS-së duhet ta dinë se po votojnë për një njeri që ka humbur zgjedhjet”, – tha Blushi. Ndërsa Fatos Nano deklaroi gjatë një emisioni televiziv nuk do të shkojë të votojë, por u bëri thirrje socialistëve që në fletën e votimit të shkruajnë “Jo bojkotit”. Nga ana tjetër, ende të pavendosur mbrëmë kanë qenë ish-presidenti Rexhep Meidani, Arben Malaj, Marko Bello.
Nga ana tjetër, në votime sot do të shkojë pjesa tjetër e socialistëve që nuk janë pozicionuar kundër Edi Ramës. Shkrimtari i njohur, Dritëro Agolli voton sot, në orën 10:00, në qendrën e votimit që do të jetë e ngritur në hollin e PS-së, në Tiranë. Vetë Edi Rama do të votojë në njësinë nr.2, ndërsa kandidati Maqo Lakrori do të votojë në njësinë nr.9.

Tërmeti në Dibër, një i lënduar dhe 60 banesa të dëmtuara

Një tërmet me fuqi 7 ballë me epiqendër fshatin Gjoricë në juglindje të Peshkopisë ka tronditur disa zona të vendit mbrëmë rreth orës 23.49.

Ora 19:30
Shtabi i Emergjencave, konfirmoi se mbi 60 shtëpi u dëmtuan. Dëmet më të mëdha, evidentohen në fshatrat e komunave Luzni dhe Muhur të Peshkopisë, si dhe në Shupenz, Ostren, Zergan e Gollobordë.
Sizmiologët, paralajmërojnë vazhdim të goditjeve, me intensitet më të ulët. Deri tani, janë regjistruar, mbi 130 pasgoditje. Ndërkaq, tërmeti i mbrëmshëm, me epiqendër në Gjoricë, lidhet me thyerjet tektonike, në brendësi të tokës, në një nga zonat më aktive në Shqipëri, si pjesë e segmentit Elbasan-Dibër.

Ora 15:45
Vazhdojnë lëkundjet e tërmetit në Dibër, me epiqendër sërish në komunën Gjoricë. Tërmeti më i fundit u regjistrua rreth orës 14.20 minuta dhe ishte me magnitutë 3.3 të shkallës Rihter. Ndërkohë kryeministri Berisha ka mbërritur në zonat e prekura nga tërmeti. Ai po viziton nga afër komunën Gjoricë, të Peshkopisë. Ndërkohë ministria e brendshme ka njoftuar se ka vënë në dispozicion dy helikopterë, për të dërguar ndihma banorëve të prekur nga ky fenomen natyror.
Informacionet e para flasin për dëme materiale në fshatrat e komunave Luzni dhe Muhur të Dibrës.
Mësohet se nje femije eshte lenduar gjate lekundjeve dhe ndodhet ne spitalin e Peshkopise, pa probleme per jeten.

Ora 10:45
Banorët të Shupenzës dhe Gjoricës, në Bulqizë, dy rajonet më të prekura nga tërmeti i djeshëm, kanë kaluar natën jashtë. Ndërkohë prefekti i qarkut të Dibrës, Xhaferr Seiti, deklaroi se tërmeti i djeshëm, ka krijuar probleme serioze pasi gati 6 shtëpi në Shupenzë dhe 3 në Gjoricë janë dëmtuar rëndë. Në këto momente duhet të nisë mbledhja e shtabit të emergjencave në Peshkopi nga e cila priten masa konkrete, për ngritjen e grupeve të punës, për të evidetuar dhe bërë vlerësimin konkret të dëme të shkaktuara. Janë verejtur dëmtime shtëpish në Bulqizë, në fshatrat Shupenz, Ostren, Zergan dhe Gollobordë, ku është ndërprerë edhe energjia elektrike. Ekspertët e Institutit të Sizmiologjisë bënë të ditur se në Tiranë dhe Durrës lëkundjet janë ndjerë deri në 5.4 ballë. Pas tërmetit, kapiteneria e Durrësit urdhëroi kthimin në port të peshkarexhave të dala në det. Lëkundjet u ndjenë edhe në Berat, Elbasan, Kavajë dhe Shkodër.
Lëkundja e parë është regjistruar në orën 23.49 të natës dhe ka zgjatur rreth 15 sekonda. Pas saj, janë regjistruar edhe 58 pasgoditje të tjera, me intensitet më të vogël, por që gjithashtu janë ndjerë.
Për fat nuk ka të dhëna për persona të lënduar, ndërkohë që dëmet kanë qenë të shumta, sidomos rreth epiqendrës. Në Tiranë lëkundja është ndjerë deri në 5.4 ballë, ndërkohë që paniku ka mbërthyer sidomos banorët e kateve të sipërme të pallateve.
Tërmeti zgjati 15 sekonda dhe është shoqëruar me 59 pas lëkundje të tjera me intensitet të vogël.

www.alblajme.com

Ohër: 19 viktima nga fundosja e anijes, ministri Janakievski jep dorëheqje

Të paktën 19 vetë kanë vdekur pasi një traget është mbytur në liqenin e Ohrit në Maqedoni. Policia lokale e ka cilësuar incidentin si një tragjedi të madhe. Anija u mbyt 200 metra larg bregut në liqen në pjesën maqedonase. Rreth 50 pasagjerë kanë mundur të shpëtohen.

Njoftimet nga vendngjarja thonë se ka pasur një shpërthim të madh dhe anija u mbyt me shpejtësi.

Sipas korrespodentit të agjencisë INA në Ohër, bilanci viktimave nga tragjedia e fundosjes së anijes me 50 pasagjerë është rritur në 19 veta. Kjo ende nuk është konfirmuar zyrtarisht nga ana e autoriteteve në terren. Ekipet shpëtimtare po vazhdojnë operacionin e shpëtimit dhe nxjerrjes së viktimave. Qeveria e Maqedonisë dhe presidenti Gjorgje Ivanov kanë shprehur keqardhje për këtë tragjedi të rëndë. Ndërkohë, po sipas korrespodentit të INA, për shkak të tragjedisë, jozyrtarisht ministri i Transportit dhe Lidhjeve ka dhënë dorëheqje, për arsye morale.

12:04 – Një anije me mbi 50 pasagjerë në bord është fundosur sot në Liqenin e Ohrit, në afërsi të autokampit “Eleshec”, njofton agjencia e lajmeve INA.

Sipas informacioneve të para deri më tani është konfirmuar mbytja e 17 personave, ndërsa druhet se numri i viktimave mund të jetë më i madh.

Jozyrtarishtë mësohet se anija ka transportuar një grup prej pesëdhjetë turistësh nga Bullgaria.

Në vijim është aksioni për nxjerrjen e trupave të viktimave. Janë angazhuar ekipe të policisë së liqenit me barka, ekipe të zhytësve specialë dhe të gjitha automjetet e ambulancave, me të cilat disponon shërbimi për ndihmë urgjente në Ohër.

Arsyeja për aksidentin ende nuk është bërë e ditur, ndërsa vendi është i siguruar nga policia, e cila nuk lejon qasje. Në vendin e aksidentit kanë mbërritur zyrtarë të qeverisë së Maqedonisë.

Jozyrtarisht, të parët në ndihmë të udhëtarëve në anijen e fundosur kanë ardhur persona nga autokampi me barkë, të cilët kanë arritur të shpëtojnë një pjesë të madhe të tyre. (INA)

Qeveria e re e Berishës, ja emrat që qëndrojnë. Pritet mbledhje e kryesisë

TIRANE- Pasi ka mbyllur me sukses marrëveshjen me LSI-në dhe pritet të formalizojë të njëjtën gjë me Republikanët dhe partinë e camëve që përfaqësohen me nga një deputet në Kuvend, duket se ajo që mbetet një vendimarrje e vështirë për kreun e qeverisë është ndarja e tortës brenda partisë së tij.
Berisha vetë në mbledhjen e fundit të qeverisë u mjaftua vetëm me shprehjen, se disa prej jush nuk do të jenë më këtu, ndërsa një ditë më parë, se as ai vetë nuk e dinte se kush do të vazhdonte të ishte në karrigen ministrore.

Por ajo që dihet me siguri është se vetë kryeministri dhe numri një i PD vazhdon me intesitet negociatat me lidershipin e partisë së tij Topalli dhe Bode, dy eskponente që kanë siguruar vazhdimësinë në këtë mandat të dytë në të njëjtat poste që mbanin edhe më parë. Topalli në drejtimin e Kuvendit dhe Bode në drejtimin e Financave.
Berisha po bëhet gati të thërasë një mbledhje kryesie për ti komunikuar të vetëve së cilin prej emrave ka vendosur të thërasë për herë të parë në qeveri dhe cilët prej aktualëve do të qëndrojnë. Por domosdoshmëria e ekuilibrave brenda PD-së duket se po e frenon Berishën të thërrasë për diskutim vetë stafin me të cilin ai ka vendosur të qeverisë sërish.

Zërat bëjnë me dije se ka një përpjekje të kryeministrit Berisha për të investuar Lulzim Bashën në drejtimin e partisë, duke e vendosur atë në pozicionin e numrit dy të PD dhe në atë të kreut të grupit demokrat. Skemë e cila mund të ofrojë ne qeveri nëkryetarin aktual Astrit Patozi, njeriu që kryesoi listën në qarkun e Vlorës.

Një tjetër variant e lë Patozin në detyrën që ka dhe e vendos Bashën në drejitimin e Ministrisë së Mbrojtjes. Dikasteri i Drejtësisë ka shumë gjasa ti mbetet sërish Enkelejd Alibeajt, i cili e mori këtë detyrë pas dorëheqjes së Ilir Rusmailit. Genc Ruli, ministria e të cilit iu dha LSI-së flietet se mund të thirret sërish në qeverinë e re, ndoshta në drejtimin e Ministrisë së Transporteve, ose në atë të Arsimit. Për Ministrinë e Brendshme duket se Berisha ka dy dilema, ose të rikthejë Sokol Olldashin, ose të promovojë zv. ministrin aktual Gent Strazimirin, nëse këtë post nuk do e marrë numri dy i demokratëve, Patozi.

Majlinda Bregu, e investuar fort në fushatën e këtyre zgjedhjeve mbetet ende midis Minsitrisë së Integrimit dhe asaj të Kulturës, ku më shumë gjasa ka të mbajë detyrën aktuale. Megjithatë duket se gjithcka për këtë skemë varet nga vetë Berisha dhe konsensusi që ai do të marrë nga bashkëpuntorët e tij të ngushtë, Topalli dhe Bode. Të hënën e 7 shatorit betohen në sallën e Kuvendit parlamentarët e rinj, nga i cili Kryeministri Berisha do të nxjerrë dhe qeverinë, të cilën do t’ia dërgojë për dekretim Presidentit të Republikës dhe më pas emrat e ministrave të dekretuar paraqiten në Kuvend për t’u miratuar dhe për të nisur detyrën e re të qeverisjes së vendit për katër vitet e ardhshme.